हरिवन नगरपालिकाका मेयर गणेश प्रसाद प्रसाईंले आफू चढ्न जीप किन्ने पैसाले नगर क्षेत्र भित्र पक्की पुल निर्माण सूरु गरेका छन् ।
कार्यालय प्रयोजनका लागि मेयर र उपमेयरले प्रयोग गर्ने सवारी साधन किन्ने बजेटबाट हरिवन नगरपालिका–८ चुरे क्षेत्र स्थित चापिनी खोलामा पुल निर्माण सूरु गरिएको नगरपालिकाले जनाएको छ । शुक्रबार बिहान एक समारोहबीच मेयर प्रसाईं र उपमेयर रेणुका पौडेलले संयुक्त रुपमा पुल निर्माणको शिलान्यास गरेका छन् । ‘विशेषगरी वर्षायाममा चापिनी खोलामा बाढी आउँदा कौवा, सखुवनी, कोठीखोला लगायतका बालबालिकाहरु थुनिने गरेका छन्’, मेयर प्रसाईंले उज्यालो अभियानसँग भने, ‘वर्षायाममा यस क्षेत्रका नगरबासीहरु दैनिक उपभोग्य सामग्री किन्न बजार एवं नगरपालिका कार्यालय आउनजान पनि नपाईरहेको अवस्थालाई मध्यनजर गर्दै आफू चढ्ने जीप किन्न नगरपालिकाबाट छुट्टयाईएको बजेटबाट पुल निर्माण सूरु गरेको छु ।’
कौवा, कोठीखोला, सखुवनी लगायत टोलमा ३०० भन्दा बढी घरधुरी रहेको स्थानीय दिलबहादुर फुयाँलले जानकारी दिए । मेयर प्रसाईंले आफू चढ्ने जीप किन्न छुट्टयाईएको बजेटले पुल निर्माण गरेर यस क्षेत्रका बासिन्दालाई ठूलो गुन लगाउँदै सह्रानीय कार्य गरेको फुयाँलको धारणा छ ।
नगरपालिकाका इन्जिनियर जकी अहमद सिद्धिकीले प्रदेश सरकारबाट आएको २५ लाख रुपैंयामा नगरपालिकाले थप गरेर जम्मा ९९ लाख तीनहजार ३९० रुपैंयामा पुल निर्माण कार्यका लागि ठेक्का सम्झौता भएको जानकारी दिए । उनका अनुसार वैशाख २१ गतेबाट १५० दिनभित्र पुल निर्माण सम्पन्न गर्नेगरी अमिता÷एसआर जेभी निर्माण कम्पनीसँग सम्झौता भईसकेको छ । पक्की पुल १६ मिटर लम्बाई तथा ४.२५ मिटर चौँडाई रहने छ ।
